Archive | economy RSS feed for this section

الاستثمار في السياحة

19 Nov

تعالوا نتكلم شوية على سوق السياحة في مصر و العالم و نشوف شوية ارقام ممكن توصلنا فرص كويسة للاستثمار.

اولا سوق السياحة في العالم:
عدد السياح في العالم في زيادة كبيرة زي الصورة اللي تحت من 1950 الى 2007

و في 2012 وصل ل 1000 مليون زيارة دولية…

من ضمن اسباب الزيادة دي حب التغيير بسبب زيادة ضغوط الحياة من اعمال و حب الاستطلاع و المعرفة و الاستجمام و الاهتمام الدولي بالسياحة و حملات التسويق الضخمة من الشركات و منظمة السياحة الدولية

و ده معناه ان السوق يكفي و زيادة بالنسبة لمصر و باقي ان مصر توفر العوامل الاساسية عشان تجذب السياح، اللي هيه ايه؟؟

عوامل جذب السياحة:

الامن:

مشكلة السياحة انها حساسة جدا للمؤشرات الامنية و ده بديهي عشان معظم اللي بيسافر بيبقى مسافر عشان يسترخي و يتفسح و يغير جو، مش عشان يلاقى نفسه في مشاكل…ياترى السائح لما يحب يتمشى بالليل عشان يتفرج عالبلد هيعرف؟

البنية التحتية:

زي وسائل التنقل و الحمامات العامة و خدمات الحجز (اون لاين و العادي) و دقة مواعيد الخدمات و سهولة المعاملات من اجراءات و خلافه و جودة الفنادق مقارنة مع اسعارها….الخ

اهل البلد: قد إيه مرحبين بالأجانب

الفلوس: سوق السياحة فيه طبقات كتيرة ناس معاها فلوس كتير و مش فارقه معاها الفلوس بس مهم قوي جودة الخدمة و ناس حساسة جداً للفلوس و الجودة مش فارقة قوي و طبقات تقنية كتيرة في النص، و هنشوف بتفصيل اكتر في الفقرة الجاية الدول الأكثر جذبا للسياحة و مقارنتها مع جودة الخدمة و الفلوس اللي بيصرفها السائح في المتوسط في البلاد دي

اماكن الجذب السياحي:

الثقافية والاثرية ،الشواطئ ،الجو

الخلاصة أن العوامل المؤثرة علي جذب السياح كتيرة و ممكن يبقى عندك عدد سياح كتير بس قيمة كل واحد في المتوسط قليلة و البيزنس الناجح لازم يحدد توليفة العوامل دي عشان يجيب أعلى عائد

في الجزء الجاي تعالو نتعرف على الدول الأكبر من حيث عدد الزيارات ليها و في نفس الوقت نقارن مصروفات كل سائح في المتوسط أثناء وجوده في البلاد دي…

الدول الاعلي في السياحة 2011:

زي ما قلنا ان مش بالضروري اكبر عدد سياح بالضرورة معناه اكبر عائدات ، لازم نحط في الاعتبار قيمة متوسط انفاق السائح ده في البلد…تعالو ناخد اكبر 10 دول في العالم من حيث عدد الزيارات الدولية ليها كمثال على عوائد السياحة…

ترتيب الدول من حيث عدد الزيارات ليها (اللون البرتقالي)  مخلاش عائدات السياحة ليها نفس الترتيب (اللون البني)…..يعني مثلا اسبانيا ترتيبها الرابع من حيث عدد الزوار و لكن نمرة 2 من حيث الايرادات من السياحة…

الملحوظة المهمة هنا برده هي نسبة الزيادة السنوية في عدد السياح…و ده عامل هيأثر في الترتيب السنوي للدول دي….تركيا مثلا كانت في 2010 ترتيبها السابع، بس لان عندها نسبة نمو عالية في اعداد السياح (8%) تركيا قدرت تبقى، مكان بريطانيا، في المركز السادس…

و ده بيدينا امل ان ممكن مصر بحكم العوامل الطبيعية لوحدها تنط في الترتيب الدولي

طب ايه العوامل اللي خلت تركيا بتكبر في السوق السياحة بالطريقة دي؟ و ايه اللي مخللي نسبة الانفاق

تعالوا ناخد مثالين لاستراتيجيتين مختلفتين، واحدة لامريكا و هي تمثل دولة متقدمة و نمرة 1 في الارباح من السياحة…و مثال تاني  تركيا كدولة قريبة مننا من حيث الموقع و الخدمات  و ليها نسبة نمو عالية:

أمريكا:

استراتيجة أمريكا تتلخص في 5 نقط….(لو حابب تقراها اضغط هنا)

1- الترويج لامريكا

طبعا امريكا ملكة التسويق .. و نتيجة الافكار اللي بتبعتها في افلامها ناس كتيرة بتبقى عايزة تروح بلد الاحلام…

و لان امريكا شايفة ان نصيبها من السياحة ممكن يتأثر من الدول الكتيرة اللي بتحارب في مجال السياحة…الحكومة الامريكية عملة مبادرة ضخمة اسمها

“Brand USA”

بتجمع فيها الحكومة مع القطاع الخاص للترويج لامريكا

و حددت اولوياتها في اليابان و بريطانيا و كندا

http://www.thebrandusa.com

2- تمكين وتحسين السياحة والسفر إلى وداخل الولايات المتحدة.

3- توفير مستوى عالمي لخدمة العملاء وتجربة الزائر.

4- تنسيق عبر الحكومة.

5-  إجراء البحوث وقياس النتائج

على قد ما الكلام بسيط بس كل نقطة من النقط دي  هي ركيزة اساسية لجذب الزوار و تحقيق اعلى دخل من كل سائح…

ممكن وضع مصر حاليا يكون مناسب ان احنا نشوف تركيا كنموذج

تركيا:

تركيا عندها تاريخ كبير و شواطئ و مزارات كتيرة و كمان البنية التحتية للدولة كويسة و جودة الخدمات في تحسن و فوق كل ده سعر الفسح فيها رخيص…وده بيخليها وجهة سياحية ممتازة…اللي فاضل هو حملات اعلامية للترويج لتركيا خصوصا في المسلسلات و الاغاني وده بيخللي الناس تتعلق بيها

ده بشكل عام الوضع في تركيا و ممكن نعمل موضوع مخصص نشرح فيه تجربة تركيا

مصر:

تعالو نشوف اكتر دول كانت بتزور مصر قبل الثورة في 2010 و تاثير الانفلات الامني علي عدد الزوار من كل دولة منهن

طبعا حصل تأثير كبير في كل دولة بس لو تلاحظو التأثير مش متساوي و ده ممكن يدينا فكرة عن طبيعة احتياجات كل سائح فيهم و الاماكن اللي بيروحها..

من ناحية تانية القدرة الشرائية للمواطن الروسي في المتوسط اقل بكتير مقارنة مع بريطانيا و المانيا و ايطاليا…بس اكيد اكبر من مصر كما هو موضح:

الرسم ده بيوضح القدرة الشرائية المتوسطة للمواطن في الدول دي…و طبعا مصر رخيصة جدا بالنسبة لهم كلهم…

مصر عندها ايه؟

زي ما قلنا في الاول السائح بيبقى عايز يغير جو و يشوف حاجة جديدة و يقابل ناس بتفكير و طباع مختلفة و يستمتع بالتجربة كلها بعيد عن بلده …

مصر فيها حاجات كتيرة جديدة و مثيرة للسائح عشان يكتشفها…مصر فيها

 مواقع اثرية  فرعونية من معابد و اهرامات و مقابر و متاحف  و بيقال ان الاقصر لوحدها فيها ثلث اثار العالم

اثار رومانية، يونانية، قبطية، اسلامية، عثمانية في كل مكان من الاسكندرية الى الاقصر الى سيوة

مصر فيها مناطق للعلاج البديل زي العلاج القديم لاهل النوبة و بدو سينة و حمامات الرمال في سفاجا و سيوة

من الناحية الثقافية فمصر غنية بتنوع ثقافي من بدو سيناء، بدو سيوة، الريف،الصعيد، النوبة، أهل بحري، اهل القاهرة و كل فريق فيهم ليه طريقة و عادات و تقاليد و فولكلور و مهرجانات … الاختلاف ده ممكن يكون مدخل للسياحة الثقافية

مصر فيها السياحة الشاطئية و اللي بيخليها متميزة هي الجو الجميل و الشواطيء و الاعشاب المرجانية و…الخ

مصر فيها محميات طبيعية ، المكتشف لحد دلوقتي 29 محمية طبيعية

التركيز كان على السياحة الشاطئية و ده نتج عنه ان 70% من عائدات السياحة في مصر ناتجة عن السياحة الشاطئية

بس الدول الاولى على العالم في السياحة مش مركزة بس في السياحة الشاطئية على العكس في فرص مركزين في حاجات تانية كتير…

فرص للاستثمار لمصر

السياحة في سيوة

سيوة بتقدم تجربة فريدة و مميزة عالميا  في مجال السياحة البيئية  المزيج بين الصحراء و الاثار و اهل البلد و جزيرة الملح و العلاج بالرمال و تجربة السفاري كل ده خلاها منطقة ذات نمو سياحي كبير و  احنا شايفين انها فيها فرص اكبر للنمو في المستقبل

مشاريع سياحية ذات صلة بالثورة

سائحين كتير بيبقى نفسهم يعرفو اكتر عن الثورة و تفاصيلها بس مفيش حتة معروفة يروحوها للتعرف على الثورة الحل ممكن يكون في عمل متحف صغير بالصوت و الفيديو و الصور، يخلي المتفرج يخش جوه الثورة من اول يوم لحد انتخاب رئيس جديد..النتحف ده هيلبي رغبة السياح في التعرف على الثورة…

الاستثمار في تكنولوجيا الحجز اون لاين

حجز المواصلات، المتاحف…الخ

السياحة الحلال

للمسلمين: تركيا من اول من بدء في الاستثمار في المجال ده و كان هدفها جمهور كان مهمش في مجال السياحة و مصر ممكن تنافس بشكل افضل في المجال ده

 مثال: http://www.crescenttours.com/pages/halal_tourism

لغير المسلمين: اجانب كتير عندهم حب استكشاف  عن حياة المسلمين اليومية و تاريخهم و معتقدتهم…ممكن عمل قرية اسلامية و يكون كل حاجة فيها اسلامي و يتم تعليم المقيمين على الاسلام  بالانشطة

السياحة الريفية

في بريطانيا السياحة الريفية بتمثل 20% من الليالي السياحية

الناس اللي عايزة الهدوء و الرخص النسبي و البعد عن التلوث  هتلاقي الريف منطقة متميزة و كمان استكشاف الحياة اليومية مع الفلاحين في الغيط و ركوب الخيل و مشاهدة الافراح الشعبية و الفلكلور بيمثل تجربة ثقافية لهواة اكتشاف الثقافات

السياحة في الفيوم

الفيوم من المناطق اللي مش واخدة حقها من حيث الاهتمام السياحي مع العلم انها ممكن تطون منطقة جذب سياحي جيد

الفيوم فيها:

وادي الريان اكبر مصب مائي في مصر

وادي الحيتان اللي فيه اثار لحيتان من الاف السنين

بواقي قصر قارون

بحيرة قارون

مسجد قايتباي

المسجد المعلق

التزحلق على الرمال

هرم هوارة و غيرها كتير…بس المشكلة في البنية التحتية الضعيفة جدا…

مهرجانات ضخمة

 بلاد كتيرة بتعتمد على المهرجانات السنوية الكبيرة عشان تحفز السياحة في فترة معينة زي البراديري في فرنساو المانيا، و المهرجانات دي بتجيب  ملايين السياح سواء لعرض  منتجاتهم او شراء منتجات

و في مهرجانات ثقافية لعرض الثقافة و العادات للسكان

او عمل مهرجانات رياضية عالمية زي ماراثون من اجل البيئة…

ها..يا ترى لقيت المجال اللي عايز تستثمر فيه؟

Advertisements